Sabores de Outono en Valdeorras é unha nova proposta da Ruta do Viño de Valdeorras para gozar do enoturismo cos cinco sentidos, unindo viño, gastronomía e territorio a través de dúas catas maridadas moi especiais.
Guiadas pola enóloga Cecilia Fernández, as sesións ofrecerán a oportunidade de descubrir tres viños da Denominación de Orixe Valdeorras, acompañados dunha coidada selección de produtos de tempada que enxalzan a riqueza gastronómica local.
Dous encontros, dous espazos con encanto
A primeira cita será o xoves 14 de novembro, ás 20:00 horas, en Esconditte Inglés (A Rúa). As adegas A Bágoa, Berna e Mil Ríos protagonizarán a velada, cun maridaxe que incluirá solombo de porco con crema de castañas, champiñóns recheos de xamón serrano e queixo, e queixo brie ao forno con mel e pistachos.
A segunda xornada terá lugar o xoves 28 de novembro, tamén ás 20:00 horas, en Aloxamento A Pontevella (Sobradelo). Nesta ocasión, as adegas Pinguela, Sampayolo e Casal ofrecerán os seus viños xunto a un menú de xabaril en caldeirada, croquetas de corzo ou xabaril, e empanada de cogomelos, que porá en valor os sabores do monte galego nesta estación.
Viño, produto local e enoturismo
Cun prezo de 12 euros por persoa, “Sabores de Outono” busca achegar a cultura do viño de Valdeorras a través de experiencias que combinan coñecemento, sabor e territorio.
As inscricións están abertas a través do formulario dispoñible na web: www.rutadelvinovaldeorras.com.
A Ruta do Viño de Valdeorras convida a veciños, visitantes e amantes do viño a deixarse levar polos aromas do outono, descubrindo a harmonía entre os viños da D.O. Valdeorras e a mellor cociña de tempada. Unha experiencia perfecta para celebrar o enoturismo en Galicia cos cinco sentidos.