Petín, un paseo pola historia é unha ruta teatralizada que invita a descubrir o pasado de Valdeorras a través dunha experiencia cultural ambientada na época da Guerra da Independencia.
O municipio de Petín converterase no escenario dunha viaxe no tempo coa ruta teatralizada “Petín, un paseo pola historia“, unha experiencia cultural que trasladará ao público á época da Guerra da Independencia en Valdeorras. A actividade terá lugar o sábado 15 de marzo ás 17:30 horas e permitirá descubrir, a través do teatro, os acontecementos e as historias vividas na comarca durante aquel período histórico. O paseo iniciarase no Ponte da Cigarrosa.
A ruta percorrerá as rúas do municipio con escenas dramatizadas que darán vida aos personaxes clave e a episodios reais do conflito. A iniciativa, interpretada pola asociación cultural Platea Luna, pretende achegar a historia local dunha maneira didáctica e entretida, facendo partícipes aos asistentes da atmosfera e das vivencias da época.
Ademais, o evento incluirá unha degustación de viños das adegas de Petín asociadas á Ruta do Viño Valdeorras, ofrecendo unha combinación única de cultura, historia e viño. O aforo está limitado a 50 persoas e o prezo da entrada é de 5 euros. Para asistir, é necesario realizar reserva previa. Neste momento as prazas están cubertas, pero se o desexas podes poñerte en contacto cos organizadores no correo info@rutadelvinovaldeorras.com.
Esta ruta teatralizada supón unha oportunidade excepcional para mergullarse no pasado de Valdeorras e coñecer, dunha maneira diferente e dinámica, o impacto da Guerra da Independencia nesta terra.