Concello de O Barco de Valdeorras 

O Barco de Valdeorras é o núcleo comercial máis importante da comarca con máis de 14200 habitantes no 2009. O xentilicio é barquense.

Esta é realmente a vila puxante na que ao achegarse a ela e do mesmo xeito que en toda a zona, atopamos xente, amable, emprendedora e traballadora. Máis aló da febril actividade económica e a marca do Sil no medio da Vila, O Barco ten un patrimonio que reflicte que a puxanza de hoxe vén de antigo.

A zona vella presume de historia nas casas blasonadas do Camiño Real acabada nunha curiosa praza aberta ao Sil. Alternando pola vila coa construción moderna temos outros bos edificios de corte colonial que nos van sorprendendo.

No marxe sur do río, A Casa Grande de Viloira preside unha praza arborizada, escalinata de lousa, dous pequenos claustros en pedra avermellada e xardíns que nos mostran todo un alarde de riqueza.

Dominando O Barco desde o Norte, Vila do Castro garda restos da Torre e os Pazos que mandaron na zona durante séculos, as súas "covas" reúnennos co viño máis tradicional.

O Mosteiro de Xagoaza, rodeado de viñedos inmaculados nunha contorna máxica vaise descubrindo a medida que ascendemos o percorrido desde Tremiñá.

Prema o icono para engadilo á Ruta personalizada